DHUNDLAATI ZINDAGI

log kehte hain ki bachpan or bachpan ki yaaden piche chhut gai, wo khel or nischhal hasi piche chhut gai, wo school or maasumiyat piche chhut gai, tute khilone or aashu pichey chhut gaye, lekin koi ye nahi kehta ki aaj hamara wo ghar chhut gaya, mata pita chhut gaye, bhai, behan or ristedar chhut gaye, bachpan se jawani tak ke saare dost chhut gaye. Or aaj samay aisa aa gaya hai, ki bharat ka har sikshit or naukri pesha navjawan apni jindagi ke raah me akela khada reh gaya hai.

Har mata pita apne bachche ke paida hone ke baad se he ye jarur sochne lagte hai ki "mera bachcha Doctor, Engineer, Advocate, M.B.A ya to Teacher banega, lekin ye sochte waqt unhe is baat ka tanik bhar bhi ehsaas nahi rehta, ki agar unka bachcha inme se koi v pesha chunega, to shayad hamesha ke liye unse dur ho jayega, or is khayal se koson dur we bachche ko kaleje ke tukde ke tarah paalte hai, or jub bachcha bada hokar aise he kisi peshe ko apnaane ke liye apna kadam ghar se bahar nikalta hai, tab maa ki aankhe bharne lagti hai, baap ka kaleja kachotne lagta hai or khud us bachche ki palken bhi sukhi nahi reh paati, lekin us waqt wo apne bhawisya ko bina dekhe ye sochta hai ki wo 4-5 saalo me wapis apne ghar, apne mata pita ke paas laut aayega. Jo ki fir kavi mumkin nahi ho pata, Bihar ke Gaya jile ka rehne wala bachcha M.B.A karne Pune pahuchta hai, or paddhai puri hone ke baad uski naukri Delhi me lagti hai, Kanpur ka rehne wala bachcha engineering ki paddhai paddhne Bangalore pahuchta hai, or paddhai ke baad use naukri Mumbai me milti hai,koi orissa se tamilnadu pahuch jata hai, to koi bengal se rajasthan, or koi gujarat se Delhi. Or in sub ke bich jo unse hamesha ke liye chhut jata hai, wo hota hai apna ghar or mata pita ka pyaar. Kehne ko to koi Engineer, koi Doctor, to koi M.B.A ban jata hai, lekin asal me jo wo banta hai, wo kisi ANAATH se kam nahi kaha ja sakta, laakh koshish karke v wo saal do saal me ek do bar he muskil se 10 dino ke liye apne ghar aa pata hai, holi, diwali, dushehra, christmas & Eid to uske liye sunday ki chhutti ban kar reh jaate hai, ghar par maa ro kar reh jaati hai, or pita mann ko santona de kar khud ko sambhal leta hai. Lekin ye kab tak? Kya koi engineer, doctor, M.B.A, army man, bank karmchari ya teacher apni naukri chhod kar kavi apne ghar wapis ja sakega?

Lakh chaah kar bhi wo kuch nahi kar pata, or fir ye sochta hai, ki ye kaisa sapna dekha usne or uske pariwar ne, jiske pura hone par pura pariwar bikhar chuka hai, ek he pariwar ke 6 sadasya, desh ke 5 alag alag sehar me akele reh rahe hai, koi delhi, koi pune,koi chennai, to koi bangalore, or mata pita Ranchi me apne ghar par akele...

Ye kaisa bhayankar sapna tha, jisne pura hokar chhanik khushi to di, lekin pura hote he ek pure pariwar ko 5 bhaagon me baant diya, ye kaisa sapna tha, jisne ek Bete ko Beti se bhi jyada paraya bana kar hazaro mil dur pahucha diya, or agar aaj Beta holi ki chhutti me ghar aata hai, to maa chaah kar bhi use ye nahi keh paati ki "Beta ab wapis mat ja".

kehne ko ham unnati kar rahe hai, khushaal jindagi ji rahe hai, Metro ki life ji rahe hai, lekin har muskurate chehre ke andar ke gam ko nahi dekh pa rahe, dil ke bhitar dard ko daba kar or aankho me aanshu chhupa kar jiye ja rahe hai,chale ja rahe hai. Lekin kya kisine ye socha? Ki aisa jina kis kaam ka, jaha ek vyakti ko apne khud ki shaadi me jaane se pehle Company ke manager se permition leni padti ho, eklauti behan ki shaadi me bhai use vidaa karne na pahuch sake, or to or, jaha mata pita ke praan tyaag dene ke ghanto baad bhi bete ko ye pata nahi ho, ki wo ab sach ka anaath ho chuka hai...

Itna sub hone ke baad bhi, jab nayi pidhi ke log khud ek mata pita bante hai, tab wo bhi usi sapne ko dobara sanjote hai, or pehle ke he tarah is bar bhi is baat ki tanik bhanak nahi hoti, ki ye sapna firse ek pariwar ko tod dega.

Lekin wo kehte hai na, "Chale to Zindagi, or ruk jaaye to Yaaden ban jaati hai Zindagi"